Ишонч – янада шижоат ва масъулиятга ундамоқда

Сув келтирган доимо элда азиз. Чунки қақраб ётган ерга сув чиқариш, шу билан эл ризқининг яратилишига ҳисса қўшиш шарафли ва масъулиятли вазифа саналади. Деҳқон катта умид билан ерга уруғ қадаб, ундан мўл ҳосил олишни, эл дастурхонини тўкин этишни режалаштиради. Агарда ёзнинг иссиқ чилласида ўз вақтида сув бормай қолса, нафақат деҳқон, балки бутун эл-юрт бундан зарар кўради. Ана шу масъулият ва мажбуриятни бўйнига олган инсонгина сувчилик касбининг этагидан тутади.

Каттақўрғонлик Актам ака Усмонов мана 30 йилдан бери сувчилик билан шуғулланиб келади. У 1988 йилда Тошкент ирригация ва қишлоқ хўжалигини механизациялаш муҳандислари институтини тугатиб, туман сув хўжалиги ташкилотига оддий мутахассис бўлиб ишга кирди. Билмаганини сўраб ўрганган олим, орланиб сўрамаган ўзига золим, деган нақлни ўзига дастуриламал қилиб олган Актам ака бу ерда катта тажриба тўплаган ҳамкасбларини ўзига устоз деб билди. Тезда жамоа орасида тилга тушиб, ҳурмати ошди. Бўлим, канал бошлиғи, бошқарма бошлиғи лавозимларида самарали меҳнат қилди. 2008 йилдан бери Зарафшон ирригация тизимлари ҳавза бошқармасига қарашли “Миёнкол-тос” ирригация тизими бўлими бошлиғи лавозимида ишлаб келмоқда.

Ушбу тизим Навоий вилоятининг Хатирчи туманидаги аҳоли ва фермер хўжаликлари ҳисобидаги 36 минг гектар, Каттақўрғон туманидаги 26 минг гектар, Иштихон туманидаги 6100 гектар ерга сув етказиб беради. Суғориш мавсумида Каттақўрғон туманига 152 миллион 600 минг метр куб, Иштихон туманига 31 миллион 600 минг метр куб, Хатирчи туманига эса 271 миллион 900 минг метр куб сув етказиб бераётганини инобатга олсак, ушбу ташкилот қишлоқ хўжалиги экинлари ҳосилдорлигини оширишга муносиб ҳисса қўшиб келаётганини англаш мумкин.

Ўтган йил Актам ака раҳбарлик қилаётган корхона фаолиятида унутилмас йил бўлди. Қишлоқ хўжалиги ходимлари байрами куни олдидан Актам Усмонов Президентимиз фармонига асосан “Меҳнат шуҳрати” ордени билан тақдирланди.

– Менга берилган ушбу мукофотни самарқандлик соҳа фидойиларига билдирилган юксак ишонч деб биламан, – дейди “Меҳнат шуҳрати” ордени соҳиби Актам Усмонов. – Очиғи, ҳамкасбларим, раҳбарларим мени табриклашганида аввалига ишонмадим. Кейин кўзимда қувонч ёшлари балқди. Қилган меҳнатларимиз давлатимиз раҳбари томонидан эътироф этилгани катта бахт эмасми, ахир! Меҳнат қилган киши доимо давлатимиз ва Президентимиз эътиборида эканлигига яна бир бор амин бўлдим. Бу мукофот бизни янада шижоат билан меҳнат қилишга, билдирилган ишончга масъулият билан ёндашишга ундамоқда.

Дарвоқе, Актам ака раҳбарлик қилаётган 45 кишилик жамоа шу кунларда экин-тикин ишлари бошланганга қадар амалга ошириладиган юмушлар тадоригини кўрмоқда. Гидропост, гидротехник иншоотларни таъмирлаш, каналларни тозалаш юмушларини жонбозлик билан олиб бораётир. Шунингдек, аҳоли ўртасида суғоришда илғор технологияларни кенг тарғиб қилмоқда. Томчилатиб суғориш, эгилувчан қувур ва плёнка тўшаш орқали суғориш экинлар ривожи учун қулайлиги, энг муҳими, ортиқча сув сарфининг камайишига хизмат қилишини жонли мисоллар орқали тушунтириб бермоқда. Олиб борилган тадбирлар натижасида 2018 йилда Каттақўрғон туманига 100 комплект эгилувчан қувурлар олиб келинди. Бир комплект эгилувчан қувур 6 гектар ерга етишини инобатга олсак, туманда 600 гектар ер майдони эндиликда эгилувчан қувур орқали суғорилади. Бу эса ишлатиладиган сув сарфининг камайишига хизмат қилмоқда.

“Ўзбекистон қишлоқ ва сув хўжалиги”
журналининг 2019 йил 1-сонидан олинди.